Mons. Jesmond Manicaro twieled Raħal Ġdid nhar is‑27 ta’ Awwissu 1964. Studja fl‑Università ta’ Malta mnejn kiseb Baċellerat fit‑Teoloġija u Liċenzjat fit‑Teoloġija Pastorali. Kompla l‑istudji tiegħu fl‑Istitut Pontifiċju Liturġiku ta’ San Anselmo f’Ruma mnejn kiseb il‑Liċenzja u d‑Dottorat fil‑Liturġija. Għallem il-liturġija fil‑Fakultà tat‑Teoloġija fl‑Università ta’ Malta bejn l-2009 u l-2021.
Hu ġie ordnat saċerdot nhar il‑5 ta’ Lulju 1991. Serva fil‑parroċċi ta’ Ħaż‑Żebbuġ, Santa Luċija, u Bormla. Bħalissa qed jaqdi l‑ministeru pastorali tiegħu bħala rettur tal‑Knisja tal‑Erwieħ f’Ħal Tarxien. Fl-2023 inħatar Monsinjur Koadjutur tal-Kapitlu Metropolitan.
Bejn is-sena 2000 u 2023 serva bħala delegat tal‑Arċisqof għal‑Liturġija biex imbagħad fil-11 ta’ Lulju 2023 inħatar Vigarju Episkopali għal-Liturġija.
Dun Michael Buġeja, minn Marsaxlokk, ġie ordnat qassis fl-1993, mill-Arċisqof ta’ Malta Mons Ġużeppi Mercieca u ġie assenjat bħala viċi kappillan fil-Parroċċa ta’ Ħaż Żebbuġ. Fl-1997 intbagħat ikompli l-ħidma pastorali fil-parroċċa taż-Żejtun u fil-Parroċċa ta’ San Ġużepp Ħaddiem f’Birkirkara, fejn wara ftit snin inħatar kappillan. Wara din il-ħidma inbagħat jagħti sehem fis-Segretarjat (illum il-Vigarjat) tal-Liturġija u fl-2015 l-Arċisqof Charles J. Scicluna għażlu ċerimonier djoċesan. Matul is-snin ħadem fuq testi liturġiċi u jagħti wkoll sehem fir-reviżjoni u t-traduzzjoni fl-ilsien Malti tal-Missal Ruman. Jgħin fil-Parroċċa ta’ Stella Maris, f’Tas-Sliema.
